xpredo script

العودة   نيو حب > مالتى ميديا > اخبار الفنانين | اخبار النجوم
التسجيل

الشاعرية اتلغت.. احنا في زمن خشن

اخبار الفنانين | اخبار النجوم

23-09-2006, 01:36 AM
bob
 
Exclamation الشاعرية اتلغت احنا في زمن خشن

السيناريست والمخرج الشاب "محمد حماد":


"محمد حماد" كاتب وسيناريست شاب، وأخيراً مخرج. حقق فيلمه الأول "الجنيه الخامس" شهرة وجدل كبيرين بسبب جرأة فكرته، وتقديمه للواقع بدون أي رتوش، واليوم بدأ فيلمه الأخير "سنترال" في صنع نفس ردود الفعل، ولو أنها تبدو أكثر بكثير من الفيلم الأول..
ازاي جات لك فكرة "سنترال" ؟ و"سنترال" معناه إيه عندك؟
الفكرة جات لي لأني بحب أدور على مكان واحد بيلم كل صور الحياة، location واحد ماحدش يطلع منه زي "الجنيه الخامس" أوتوبيس بيلم ناس، وهنا في "سنترال" هنلاقي "سنترال" بيلم ناس برضه، ده غير إني بحب كل الأماكن المُستحدثة، و"السنترال" شيء مستحدث شفناه من 5 أو 6 سنين فاتوا، بجانب حبي للأماكن، المكان ليه نوع من الحميمية، ومايهمنيش أعمل الفيلم دار في أي يوم أكثر من إني باهتم بالمكان اللي بتدور فيه الأحداث..
فيلمك "الجنيه الخامس" وصفه كثير من الناس بإنه جرئ، وده طبعاً خلى الفيلم يواجه صعوبات كثيرة جداً عشان يتعرض.. ده ماخلكش تخاف إنك تكرر نفس التجربة؟؟
ماخفتش إني أعمل "سنترال"، أنا باكتب فيلم عشان أقول حاجة، لو ماعنديش حاجة أقولها ماكتبش أحسن، الموضوع هو اللي بيحركني، ويخليني أعمل فيلم، زمان كنت بخاف، لكن مع الوقت قلت المفروض ماأخافش، لأنه هو ده الصح..
"الجنيه الخامس" جريء، و"سنترال" أكثر جرأة، هل ده خط "حماد" ماشي عليه؟!
هاقول لك على حاجة.. الاتجاه ده تكوين، كل واحد بيتكون بطريقة، وأنا كبرت واتكونت في بيئة معينة، أفلامي بتعبر عنها، أنا مش مؤمن بفن الوعي، عشان واعي لازم أكتب أو أخرج، أنا بحب البراءة، وده باعبر عنه في أفلامي..

لاحظت إن "الجنيه الخامس" و"سنترال" أحداثهم عاملة زي اليوميات.
على فكرة أنا بحب اليوميات جداً، وهو فعلاً شيء مقصود في أفلامي، زمان أنا كنت بحب أكتب يومياتي، لكن العادة دي للأسف اتلغت، مش عشان الوقت، لا عشان الخشونة، الحياة خشنة جداً، وده موجود في أفلامي، هتلاقي الخشونة والبرودة والجفاف، التمثيل دائماً مكتوم، إنت بتسمع الصوت بيعلق على الأحداث، لكن كل حاجة مكتومة، ده غير إني بحب الحاجات السريعة، عشان كده أفلامي زي الطلقات، مابخليش المشاهد قاعد مستريح أو يتنهد، لأن الشاعرية اتلغت، يمكن كانت موجودة في زمن معين، بس دلوقتي ملغية..
بالنسبة للألفاظ اللي في الفيلم مش شايف إنها كانت زيادة شوية؟
مش هاقول لك غير إن هي دي حياتنا، الألفاظ دي موجودة، وفي فيلمي اللغة عادية جداً، وبعدين لو قلنا غير كده يبقى احنا خلاص اتعودنا على الازدواجية..
"الجنيه الخامس" مأخوذ عن قصة قصيرة ليك، لكن "سنترال" هو "تأليف: محمد حماد"، هل إنت من خلال "سنترال" بتعلن بعدك عن الكتابة الأدبية واتجاهك للكتابة السينمائية؟
لا طبعاً، أنا بحب أكتب أدب برضه، لأنه فن راقي جداً، وهي الحكاية في الآخر أفكار، يعني الكتابة واحدة، بس كل وسيلة وليها طريقتها، يعني الكتابة للسينما غير كتابة الرواية مثلاً، لكن في النهاية متصلين، لأن الصورة بتكمل الكتابة..
إيه شعورك وإنت مخرج لأول مرة؟
الحقيقة أنا طول الوقت باخرج على الورق، وعمري ما حسيت لما بكتب إني ماباخرجش، وكمان عندي خبرة، لأني إشتركت كمساعد مخرج لفترة في عمل من الأعمال، وممكن أخرج حاجة أنا ماكتبتهاش وحد ثاني كتبها، أنا شايف كل ده عادي جداً، أهم حاجة تعجبني الفكرة..
"حماد" بيكتب في "عالم سمسم".. "حماد" بيكتب في مسلسل "sit com" هيتعرض في رمضان الجاي.. "حماد" بيكتب فيلم روائي قصير.. مابتحسش إنك مشتت بين كل الأعمال دي، وإن الحاجات دي كلها مابتعطلكش عن اتجاهك للسينما؟؟
أولاً أنا بحب "عالم سمسم" جداً، وممكن أشتغل فيه بدون فلوس، لأني بحب الأطفال، حاجة كده بريئة لسه ماتلوثتش، لكن كل الحاجات اللي قلتها دي مش هاكذب عليك، دي عشان الفلوس، ده أكل عيشي، وبعدين مافيش تشتت لأن دي مهنتي..

توقعت ردود أفعال معينة من الجمهور؟؟
توقعت إن الناس هتشتمني، وتقول لي إن شغلك مش حلو، المشكلة إن مجتمعنا ثقافته سماعية، احنا شعب ثقافته مسلسلاتي مش سينمائي، وعشان كده الجمهور لسه قدامه كثير عشان يفهم لغة الصورة، فيه ناس بتقول على فيلمي إنه وضيع، لكن من وجهة نظري الوضاعة أكثر إننا نتبنى فكرة "المشاهد الضحية"، بمعنى لو قلت للمشاهد الحقيقة في فيلم كأني بادبحه!! وياريت بدل ما السؤال يكون "ازاي تعمل فيلم زي ده؟!"، يتغير عشان يبقى "هو في تطور عن "الجنيه الخامس" ولا لأ؟!"، أنا كنت متوقع الشتائم وكل ده، لأن فيلمي مش حبوب، فيلمي مش طيب، بس النهاردة في الندوة زادت قوي حكاية التمويل الأجنبي، والكلام الغريب ده!!
فيه مشروع لفيلم جاي؟
الحقيقة مافيش في دماغي حالياً فكرة لفيلم، بس هو أكيد هيكون في نفس اتجاه الفيلمين اللي فاتوا..
تقول إيه لصُناع فيلم "سنترال"؟
باقول لهم شكراً.. شكراً ليكم بجد
من مواضيع : bob تجربة مماثلة لـ وقات فراغ
كريم عبد العزيز
تغيير "يعقوبيان" المسلسل عن "يعقوبيان" الفيلم بسبب الرقابة!!
قريبا.. ألوان السما السابعة
5 يوم في إجازة نصف العام
 

الكلمات الدلالية (Tags)
الشاعرية, اتلغت, احنا, حزن, سلو, في

أدوات الموضوع

الانتقال السريع

الشاعرية اتلغت.. احنا في زمن خشن

الساعة الآن 05:14 AM.